У нашым грамадстве ёсць людзі, якія зведалі цяжкасці і былі часова выключаны з яго. Аднак ёсць надзея і магчымасць новага пачатку праз працэс рэсацыялізацыі. Гэты працэс дапамагае Вольным вярнуцца ў грамадства, аднавіць навыкі, упэўненасць і самаацэнку.

Падчас рэсацыялізацыі чалавек:

✅ Аднаўляе страчаны сацыяльны статус

✅ Змяняе свае паводзіны

✅ Фарміруе новыя сацыяльныя сувязі

✅ Засвойвае нормы, культурныя і сацыяльныя каштоўнасці грамадства.

🗣 Экспертка і псіхалагіня ініцыятывы Volnyja растлумачыла, што такое рэсацыялізацыя і навошта яна патрэбна.

‍
Рэсацыялізацыя - гэта працэс вяртання да жыцця ў новым ці іншым грамадстве.

Рэсацыялізацыя дапамагае чалавеку аднавіць свае навыкі, упэўненасць і самаацэнку, каб паспяхова вярнуцца ў штодзённае жыццё і сацыяльна адаптавацца.‍

‍
Хто праходзіць праз рэсацыялізацыю?
‍‍

• Былыя зняволеныя
• Людзі, якія пакутуюць ад залежнасцяў
• Уцекачы і вымушаныя мігранты
• Дзеці і падлеткі, якія былі аддзелены ад сваіх сем'яў
• Людзі, якія нечакана змянілі сваё жыццё або кола зносін (з-за хваробы, дэкрэтнага водпуску, новага сацыяльнага статусу)

‍

Чаму рэсацыялізацыя патрэбна Вольным? 

1. Падтрымка пры вырашэнні праблем

Пасля выхаду Вольныя сутыкаюцца з шэрагам праблем: ад забытага вопыту выкарыстання тэхнікі да здольнасці рабіць выбар. Гэта адбываецца таму, што ва ўмовах зняволення ў чалавека ёсць нневялікая колькасць рэчаў, на якія чалавек можа ўплываць, і выбар часцей за ўсё робіцца за яго_яе.

Найлепшае, каб побач было надзейнае плячо.

2. Дапамога ў перажыванні складаных пачуццяў

Эйфарыя ад вызвалення і сустрэчы з блізкімі, расчараванне ад таго, што нейкія чаканні маглі не апраўдацца, трывога, звязаная з прыстасаваннем да новага жыцця і нявызначанасцю з працай, адукацыяй, адносінамі і жыллём, а мабыць і трывога з-за неабходнасці ўзаемадзейнічаць з органамі і страх магчымасці паўторнага арышту.

3. Пераадоленне прадузятасці

Некаторыя Вольныя могуць адчуваць віну і кляймо злачынца на сабе. Будучы нявінна асуджанымі, людзі страчваюць давер да навакольных. 

Рэсацыялізацыя дазваляе людзям аднавіць свой гонар і годнасць, а таксама атрымаць падтрымку ад грамадства.

4. Праца над сабой 

Многія ўжо падчас зняволення ці нават праз нейкі час пасля вызвалення могуць сутыкнуцца з дэпрэсіяй і ПТСР (посттраўматычным стрэсавым расстройствам). 

Сістэмная праца над сабой, сваёй якасцю жыцця дае Вольным шанец на акрыянне і прадухіленне сур'ёзных наступстваў.

‍

Навошта патрэбна рэсацыялізацыя грамадству?

Рэсацыялізацыя спрыяе ўмацаванню грамадства, бо паспяхова адаптаваныя людзі становяцца яго актыўнымі і карыснымі чальцамі. Тым больш гэта зараз неабходна беларускай супольнасці, каб быць кансалідаваным і праяўляць салідарнасць.

‍

Дапамажыце разам з намі Вольным вярнуцца да нармальнага жыцця! 

Калі ёсць пытання і прапановы, пішыце нам.