Зьміцер Фурманаў

“Я з’ехаў з Беларусі ў дзень вызвалення, калі даў інтэрв’ю для СМІ, таму што меў патрэбу распаўсюдзіць праўду”

‍

Гісторыя Вольнага

Зьміцер Фурманаў быў затрыманы яшчэ падчас збору галасоў за кандыдатаў у прэзідэнты, 29 траўня 2020 года. 

Прыгавораны да 2 гадоў пазбаўлення волі ў калоніі ва ўмовах агульнага рэжыму. Вызваліўся  21 кастрычніка 2021, адбыўшы тэрмін цалкам.

Цяпер Зьміцер жыве ў Вільні і адзначае, што на рэсацыялізацыю яму спатрэбіўся год:

“Рэсацыялізацыя супала з праграмай інтэграцыі ў літоўскае грамадства, але літоўскую мову не атрымалася падняць на высокі ўзровень, бо яна даволі складаная”.

Увесь час зняволення Зьмітра падтрымлівала ягоная дзяўчына Воля. Яна дачакалася Вольнага і параіла з’яджаць за мяжу пасля вызвалення праз рызыку патрапіць за краты ізноў. Ужо ў Літве пара ажанілася.

‍

Якія планы на будучыню?

“Зараз мы з жонкай Воляй адчыняем краму-прастору і марым, каб яна працавала на карысць беларусаў, то бок на захаванне самаідэнтычнасці беларускай культуры і мовы,” – расказвае Зьміцер. 

‍

Пра цяжкасці

Зьміцер адзначае, што самым складаным пасля вызвалення было расстанне з бацькамі: з-за пераезду яны бачыліся толькі некалькі гадзін. 

Да гэтага часу застаецца боязь зачыненых на замок дзвярэй, калі ён застаецца ў памяшканні. 

‍

Праблемы Вольных 

Зьміцер на сваім досведзе ведае, што пасля вызвалення цяжкасці не скончваюцца: 

“Я лічу, што кожн_ая Вольн_ая мае патрэбу ў ментар_цы, бо пасля вызвалення людзі шмат чаго не разумеюць і не ведаюць, што рабіць. Як і з дзіцём, тут трэба надзейнае плячо ўзрослага і адказнага чалавека, які падтрымае і накіруе ў правільны бок”.

‍

Падтрымка сваякоў Вольных

“Падтрымка патрэбная і сваякам Вольных, бо многія не ведаюць, як дапамагаць, куды звяртацца і якія ўвогуле правы і магчымасці маюць яны і блізкія. А мы ў ініцыятыве Volnyja можам пра гэта падказаць і зрабіць падтрымку даступнай,” – дзеліцца меркаваннем Зьміцер.

‍

Калі мы падтрымліваем Вольных, мы клапоцімся пра будучае беларускае грамадства. 

Будзьма салідарнымі і далучайцеся да ментар_ак! 

‍